Lahore Lahore Aye

لہور لہور اے ۔۔۔
نہرو نہر ڈرائیو کردے
گھر آگئے آں
تے رب دا شکر منالیا ۔۔۔
مینوں تے میرا لہور ای سوہنا دسدا
ہر رنگ چ رنگ مچدا ۔۔۔
بھانویں دھند ہووے
بھانویں چانن بتیاں دا
بھانویں پھلاں تے بہار دا رنگ کھڑے
بھانویں پتیاں دے پت جھڑ دا روپ چڑھے
بھانویں ملنگ کوئی داتا دا منگدا پھرے
بھانویں گڈی چوں نکلے سوٹڈ بوٹڈ منڈا سوہنا جہیا
بھانویں چنی کوئی دندیاں چ لے ہسدی
بھانویں مٹیار کوئی سونے جئے رنگ دی
بھانویں کھلے والاں چ
پاٹی جینز دے سٹائل نوں ایٹیٹیوڈ دے نال
پنجابی لہجے چ اردو بول کے او
وچ وچ انگریجی دا تڑکا لا ۔۔۔
بلیاں مروڑکے سوہنی ماڈل جئی ۔۔۔
اتم سوہنی لگدی ۔۔۔
گلاں کھچ کھچ کے لمبے لہجے وچ
نکیاں نکیاں تے بھولیاں کری جاندی
آپ ولوں جیویں فلسفے تے نفسیات داں
وڈی گنڈھ گنجھلاں دی پھرولی جاندی
تے کدی ر نوں ڑ ڑ لہوڑن کڑی ۔۔۔
اووڑ کانفیڈینس نال کڑی جاندی
بھانویں کباڑئیے دا ہوکا اے
بھانویں بھاجی دا
گوبھی ٹینڈے کریلا وکدا اے
بھانویں میٹرو تے اورنج ٹرین ہووے
بھانویں نواں کوئی اووہیڈ رستہ اے
میں ہر رستے تو انج لنگھدی پھراں
جیویں رانی لہور قلعے دی دورے تے
اے رونقاں شہر لہور دیاں
نئیں دسنیاں کدرے ہور چناں
ایہ لہور اے بس لہور جہیا
جنے نئیں ویکھیا
او سنیا نئیں جمیا !؟

عذرا مغل

ہماری پلیٹفارم پر بڑی تعداد میں تصاویر گوگل امیجز اور پیکسلز سے حاصل کی گئی ہیں اور ان کا کاپ رائٹ مالکیت ظاہر نہیں کر سکتی۔ اگر کوئی کاپی رائٹ دعوے ہوں تو ہم فوراً معذرت کے ساتھ تصویر کو ہٹا دیں گے